تجري جهات التحقيق تحقيقات موسعة في اتهام زوج لزوجته بالجمع بين زوجين، مؤكدا أنها تزوجته بعقد عرفي، قبل أن يكتشف – وفقا لأقواله – أنها ارتبطت رسميا برجل آخر رغم استمرار زواجهما.

وأضاف الشاكي في أقواله أمام جهات التحقيق أنه عاش مع زوجته حياة زوجية مستقرة، قبل أن يفاجأ بارتباطها بشخص آخر، الأمر الذي دفعه إلى تحرير المحضر والمطالبة بالتحقيق في الواقعة، والوقوف على مدى صحة المستندات الخاصة بالزيجات الواردة بالأوراق.

وجاءت أقوال الزوج بالمحضر كالتالي:

 س: ما تفصيلات شكواك تحديدا؟
 ج: اللي حصل أني تزوجت من جيهان بتاريخ 2024/2/12 زواج عرفي في مكتب محامي، ويوجد شهود علي العقد، واستمرت العلاقة بيننا وأخدنا شقة سكنية في حدائق اكتوبر وكنا مقيمين فيها، وكنا نتقابل يومين أو ثلاثة علي حسب ظروفي وظروفها، وفي يوم قالت ان ابنها عرف انها متجوزة عرفي وهي قالت لابنها اني طلقتها واستمرت العلاقة بيننا وحصل حمل وساعتها اتفقنا علي الطلاق.

وهي قالت لي انها قطعت ورقة الزواج العرفي اللي بينا وقالت لي انها حامل ولما اهلها عرفوا انها حامل وحصل خلاف بينها وبين اهلها، ساعتـها بعتت لي رساله صوتيه قالت فيها لو رنيت عليك مرة واحدة يبقوا عايزين يطلقونا من بعض، ولو رنيت عليك كتير يبقوا عايزين نكتب رسمي علشان ياخد العيل.

بعدها عرفت انها عملت عملية اجهاض ونزلت اللي في بطنها، استمرت العلاقة الزوجية بينا عـادي ولكن بدأت تعمل معايا مشاكل وتطلب الطلاق، وتاني يوم نتصالح لغاية يوم 2024/12/7 كانت موجود معايا في الشغل وكانت بايتة معايا في شقتي لمدة ثلاثة أيام، وبعدها لقيتها اختفت ومش عارف هي فين، وحاولت اتواصل معاها بس مش عارف، وفي يوم 2024/12/20 تقريبا لقيتها بتتواصل معايا، وبعتتلي رساله في 2024/12/17 تطلب مني الطلاق، واستمرت العلاقة بيننا بعد كدة لغاية تاريخ 2025/4/18 بعتت لي رساله بتقول لي فيها انت جوزي وحبيبي.

ساعتها انا شكيت فيها لان الخلاقات بقت كثيرة ودخل الشك بيننا، وفي شهر اكتوبر 2025 كانت سافرت السعودية وقالت انها مسافرة مع اخوها. وفي 2025/10/2 حصلت خناقة بينا لأنها رفضت اني اعاشرها معاشرة الأزواج وبعدها مشيت.

وانا بعدها قلتلها انا فضيت اوضة النوم وقلت لها اني هاتجوز غيرها. وفي 2025/12/28 لقيت حد بعت لي رساله فيها صورة عقد زواج رسمي بين جيهان وماجد. اتصلت بيها بعد ما شافت الرساله انكرت وقالت محصلش، وواحد من زمايلها في الشغل قالو لي انها جت ومعاها واحد وقالت انه جوزها.

انا بعدها شكيت في الموضوع وبدأت ادور على الحقيقة، لغاية ما عرفت بيت ماجد زوجها وهي عرفت اني انا عرفت، فاتصلت عليا وقالت لي لا تفضحني ونلم الموضوع، ولكنها بعد كدة هددتني بمراتي انها تعرف مراتي وأهلي، وفعلا عرفت مراتي هي قالت لي انها اتصلت بي وقالت لي انت فضحتني، وانا قلت لها وحدي الله ونحاول نحل الموضوع.

وقلت لها ألف مبروك وبالرفاء والبنين وده علشان اعرف اخد حقي بالقانون، بعد كدة اخدت الاجراء القانوني وقدمت فيها شكوي وده اللي حصل.

س: ما هي طبيعة علاقتك بالمتهمة؟
هي زوجتي وفيه بيننا عقد زواج عرفي.
س: ما زالت علاقة الزوجية قائمة فيما بينكما؟
  ج: ايوه.
س: ومتي بدأت علاقة الزوجية فيما بينكما؟
 ج: هي من تاريخ 2024/2/12.
س: وما هو عنوان مسكن الزوجية الخاص بكما؟
  ج: في عمارة في كومبوند حدائق أكتوبر.

س: وهل تقيما بذلك المسكن اقامة دائمة؟
 ج: ايوة كنا مع بعض بس مش طوال الأيام كانت بتيجي كل ما يكون عندها شغل في القاهرة يعني ممكن يومين او ثلاثة في الاسبوع لحد 2025/10/3 وبعد كدة هي ما جاتش الشقة تاني.