عاجل | كازا.. مهنيو النقل السياحي كيطالبو وزير النقل بالتدخل العاجل لحل مشاكل القطاع ومنها أزمة “أولاد زيان” ودعم المازوط

وجهات الهيئات المهنية الممثلة لقطاع النقل السياحي مراسلة لوزير النقل واللوجستيك، طالبتو فيها بتدخل عاجل لحل مجموعة من المشاكل اللي ولى كيعاني منها القطاع، وعلى راسها التعقيدات الإدارية المرتبطة بمصلحة “أولاد زيان” فكازا .

وعبرو المهنيني فبلاغ كتوفر “كود” على نسخة منو على الاستياء ديالهم من استمرار إلزام شركات النقل السياحي بالتوجه لمصلحة أولاد زيان، واخا أن طبيعة النشاط ديال النقل السياحي مختلفة على النقل العمومي للمسافرين، معتبرين أن هاد الوضع كيزيد يعطل الملفات وكيثقل كتاف المقاولات المهنية.

وأكدو ممثلي هاد القطاع أن شركات النقل السياحي كتواجه بزاف ديال الصعوبات المرتبطة بالدعم ديال مازوط المهني، وتعطال فمعالجة الملفات الإدارية والرخص الخاصة بطوموبيلات جديدة، وسط غياب تواصل واضح مع بعض المصالح الجهوية.

وشدد نفس المصدر على أن النقل السياحي كيلعب دور أساسي فتنشيط السياحة الوطنية ودعم الاقتصاد، خصوصاً فظل الدينامية اللي كيعرفها المغرب والاستعدادات للتظاهرات الدولية الكبرى، وهو ما كيستوجب توفير إدارة مرنة ومساطر مبسطة تشجع الاستثمار وتحافظ على استقرار المقاولات.

وفالأخير طالبو المهنيين باش يتفتح حوار مباشر ومستعجل مع وزارة النقل، باش ايلقاو حلول عملية لمختلف الإشكالات اللي كيعرفها القطاع، وعلى رأسها ملف أولاد زيان ودعم لمازوط المهني، حفاظاً على استمرارية الشركات ومناصب الشغل.